Money Exchange Rate അബുദാബി: നാട്ടിലേക്ക് പണം അയക്കാൻ നല്ല സമയമാണിതെങ്കിലും രൂപയുടെ മൂല്യത്തകർച്ച പല പ്രവാസികൾക്കും നേട്ടമാക്കാൻ കഴിഞ്ഞിട്ടില്ല. ശമ്പളം കിട്ടാൻ 5 ദിവസം കൂടി കാത്തിരിക്കേണ്ടതാണ് ഇതിന് കാരണം. സ്വരുക്കൂട്ടിയ തുകയും കടം വാങ്ങിയും ക്രെഡിറ്റ് കാർഡിൽ നിന്ന് പണം പിൻവലിച്ചും നാട്ടിലേക്കു അയയ്ക്കുന്നവരുണ്ടെങ്കിലും ഇവരുടെ എണ്ണം കുറവാണെന്ന് ധനവിനിമയ സ്ഥാപനങ്ങൾ വ്യക്തമാക്കി. യുഎഇ ദിർഹം 24.18 രൂപയും കുവൈത്ത് ദിനാർ 290.45 രൂപയും സൗദി റിയാലിന് 23.65 രൂപയും ഖത്തർ റിയാൽ 24.37 രൂപയും ഒമാൻ റിയാൽ 230.75 രൂപയും ബഹ്റൈൻ ദിനാർ 235.31 രൂപയുമാണ് ഇന്നത്തെ വിനിമയ നിരക്ക്.

ഈ നിരക്ക് മാസാവസാനം വരെ തുടർന്നാൽ പണമൊഴുക്ക് 25% വരെ വർധിച്ചേക്കുമെന്നാണ് എക്സ്ചേഞ്ച് വൃത്തങ്ങൾ ചൂണ്ടിക്കാട്ടുന്നത്. ചില മണി ആപ്പുകൾ ഇടപാടുകൾ സേവന നിരക്ക് ഈടാക്കുന്നില്ല. എന്നാൽ, മറ്റു ചില ആപ്പുകളിൽ 5 മുതൽ 8 ദിർഹം വരെയാണ് സർവീസ് ചാർജ്. എക്സ്ചേഞ്ചുകൾ 23 ദിർഹമാണ് സേവന നിരക്കായി ഈടാക്കുന്നത്. രാജ്യാന്തര നിരക്ക് 24.15 രൂപ ആയെങ്കിലും യുഎഇയിലെ ചില എക്സ്ചേഞ്ചുകളിൽ ഒരു ദിർഹത്തിന് 24.07 രൂപയാണ് നൽകിയത്. മണി ആപ്പുകളിലൂടെ പണം അയയ്ക്കുന്നവരുടെ എണ്ണത്തിലും വർദ്ധനവുണ്ടായിട്ടുണ്ട്. രാജ്യാന്തര നിരക്ക് പൂർണമായും ലഭിക്കുന്നതും സേവന നിരക്കിലെ ഇളവും യഥാസമയം അക്കൗണ്ടിൽ പണം എത്തും എന്നതുമാണ് മണി ആപ്പുകളിലേക്ക് തിരിയാൻ ജനങ്ങളെ പ്രേരിപ്പിക്കുന്നത്. എക്സ്ചേഞ്ചിൽ പോകാതെ ഏതു സമയത്തും മൊബൈൽ ഫോൺ വഴി എവിടെ നിന്നും പണം അയയ്ക്കാമെന്നതാണ് മറ്റൊരു പ്രധാന നേട്ടം.

യുഎസ് പ്രസിഡന്റ് ഡോണൾഡ് ട്രംപ് വിസ ഫീസ് ഒരു ലക്ഷം ഡോളറാക്കിയതിലെ അസ്ഥിരതയാണ് വിനിമയ നിരക്കിലെ ചാഞ്ചാട്ടത്തിന് പ്രധാന കാരണമായി സാമ്പത്തിക വിദഗ്ധർ ചൂണ്ടിക്കാട്ടുന്നത്. ഇതേ തുടർന്ന് ഇന്ത്യൻ ഓഹരി വിപണികളിലും ഇടിവുണ്ടായി. ഐടി കമ്പനികളുടെ ഓഹരിവിലയും ഗണ്യമായി കുറഞ്ഞു.

യുഎഇയിലെ പുതിയ ജോലി ഒഴിവുകൾ അറിയുവാൻ ഇവിടെ ക്ലിക്ക് ചെയ്യുക

ഗൾഫിൽ നിന്നുള്ള ലഹരി മാഫിയയുടെ മുഖ്യ ഏജന്റ്; എഞ്ചിനീയറിംഗ് ബിരുദധാരിയായ മലയാളി യുവതിയെ അറസ്റ്റ് ചെയ്ത് പോലീസ്

Drug Case Arrest കൊല്ലം: ഒമാനിൽ നിന്നുള്ള ലഹരിമാഫിയയുടെ മുഖ്യ ഏജന്റിനെ നാട്ടിൽ വെച്ച് പിടികൂടി പോലീസ്. മാങ്ങാട് ശശി മന്ദിരം വീട്ടിൽ ഹരിത ആണ് അറസ്റ്റിലായത്. കൊല്ലം വെസ്റ്റ് പോലീസ് ആണ് ഇവരെ പിടികൂടിയത്. നഗരത്തിൽ 75 ഗ്രാം എംഡിഎംഎ പിടികൂടിയ കേസുമായി ബന്ധപ്പെട്ടാണ് ഹരിത അറസ്റ്റിലായതെന്ന് പോലീസ് വ്യക്തമാക്കി.

കേസിൽ ഇതുവരെ നാലു പേരാണ് പിടിയിലായത്. ഓഗസ്റ്റ് 24ന് 75 ഗ്രാം എംഡിഎംഎയുമായി പുന്തലത്താഴം സ്വദേശി അഖിൽ ശശിധരൻ പിടിയിലായിരുന്നു. വിപണിയിൽ 5 ലക്ഷം രൂപ വില വരുന്ന എംഡിഎംഎയാണ് ഇയാളിൽ നിന്നും പിടിച്ചെടുത്തത്. സിറ്റി ഡാൻസാഫും വെസ്റ്റ് പൊലീസും ചേർന്നാണ് ഇയാളെ അറസ്റ്റ് ചെയ്തത്. അഖിലിനെ ചോദ്യം ചെയ്തതിൽ നിന്നാണ് നഗരത്തിലെ എംഡിഎംഎ വിതരണത്തിന്റെ മുഖ്യ ശൃംഖല ഇതിൽ ഉൾപ്പെട്ടിട്ടുണ്ടെന്ന കാര്യം പോലീസിന് മനസ്സിലായത്.

എസിപി എസ്.ഷെരീഫിന്റെ നേതൃത്വത്തിലുള്ള പ്രത്യേക അന്വേഷണ സംഘത്തിന് സിറ്റി പൊലീസ് കമ്മിഷണർ കിരൺ നാരായൺ രൂപം നൽകിയിരുന്നു. എംഡിഎംഎ വാങ്ങുന്നതിനായി അഖിലിനെ കാത്തു നിന്ന കല്ലുംതാഴം സ്വദേശി അവിനാശിനെ അന്ന് വൈകിട്ട് തന്നെ പിടികൂടി. അഖിലിനെ പിടികൂടിയത് അറിഞ്ഞു ഒളിവിൽ പോയ രണ്ടാമത്തെ വിതരണക്കാരായ ശരത്തിനെ എംഡിഎംഎ കച്ചവടം നടത്തുന്നതിനിടയിൽ 12 ഗ്രാം എംഡിഎംഎയുമായി പോലീസ് അറസ്റ്റ് ചെയ്തിരുന്നു. ഇവരെ ചോദ്യം ചെയ്തതിൽ നിന്നാണ് ഹരിതയെ സംബന്ധിച്ച വിവരങ്ങൾ ലഭിച്ചത്. നേരത്തെയും ഹരിത എംഡിഎംഎ കേസുമായി ബന്ധപ്പെട്ട് പിടിയിലായിരുന്നു. എഞ്ചിനീയറംഗ് ബിരുദധാരിയാണ് ഹരിത. അവിനാഷും ഹരിതയും കോളജിൽ ഒരുമിച്ച് പഠിച്ചവരാണ്. പഠനം കഴിഞ്ഞ ശേഷമാണ് ഇവർ ലഹരിക്കടത്തിലേക്ക് തിരിഞ്ഞത്. 2025 ജനുവരിയിൽ ജാമ്യത്തിൽ ഇറങ്ങിയ ശേഷം ഹരിത ഒമാനിൽ മാതാപിതാക്കളുടെ അടുത്തേക്ക് പോയി. അവിടെ നിന്ന് എംഡിഎംഎ കടത്തിന്റെ ഏജന്റായി പ്രവർത്തിക്കുകയായിരുന്നു. ഹരിതയുടെ മൊബൈൽ പരിശോധിച്ചതിൽ ലഹരി കച്ചവടം നടത്തിയ ഒട്ടേറെ വിവരങ്ങൾ പോലീസ് കണ്ടെടുത്തിട്ടുണ്ട്.

പ്രവാസികളുടെ ശ്രദ്ധയ്ക്ക്; യുഎഇയിൽ വിസയ്ക്ക് അപേക്ഷ നൽകാൻ ഈ രേഖ നിർബന്ധം

Visa Application ദുബായ്: ഇനി മുതൽ യുഎഇയിൽ വിസയ്ക്ക് അപേക്ഷ നൽകുന്നവർ പാസ്പോർട്ടിന്റെ പുറം കവർ പേജിന്റെ പകർപ്പും സമർപ്പിക്കണം. പുതിയ നിബന്ധന സംബന്ധിച്ചുള്ള സർക്കുലർ ഈ മാസം ലഭിച്ചതായാണ് ദുബായിലെ ആമർ സെന്ററുകളിലെയും ദുബായ്, അബുദാബി എന്നിവിടങ്ങളിലെ ടൈപ്പിങ് സെന്ററുകളിലെയും ജീവനക്കാർ വ്യക്തമാക്കുന്നത്.

എല്ലാ എൻട്രി പെർമിറ്റ് അപേക്ഷകൾക്കും പാസ്പോർട്ടിന്റെ പുറം പേജ് നിർബന്ധിത രേഖയായി ഉൾപ്പെടുത്തിയിട്ടുണ്ട്. എല്ലാ രാജ്യക്കാർക്കും എല്ലാതരം വീസകൾക്കും ഇത് ബാധകമാണെന്ന് സർക്കുലറിൽ വ്യക്തമാക്കിയിട്ടുണ്ട്. ഈ മാറ്റം പ്രധാനമായും ബാധിക്കുക പുതിയ വിസ അപേക്ഷകളെയാണ്. അതേസമയം, ഫെഡറൽ അതോറിറ്റി ഫോർ ഐഡന്റിറ്റി, സിറ്റിസൺഷിപ്, കസ്റ്റംസ് ആൻഡ് പോർട്ട് സെക്യൂരിറ്റി (ഐസിപി), ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്‌സ് അഫയേഴ്‌സ് (ജിഡിആർഎഫ്എ) തുടങ്ങിയവർ ഇതുമായി ബന്ധപ്പെട്ട പ്രസ്താവന പുറത്തിറക്കിയിട്ടില്ല. കൂടുതൽ വിവരങ്ങൾ ലഭിക്കാൻ ഐസിപിയുടെ 600 522222, ജിഡിആർഎഫ്എ-ദുബായുടെ നമ്പർ: 800 5111 എന്നീ നമ്പറുകളിൽ ബന്ധപ്പെടേണ്ടതാണ്.

യുഎഇയിൽ ആപ്പിൾ അഞ്ചാമത്തെ സ്റ്റോർ തുറന്നു; ആദ്യത്തേത്…

Apple Store in UAE ദുബായ്: യുഎഇയിൽ ആപ്പിൾ അഞ്ചാമത്തെ സ്റ്റോർ തുറന്നു. അല്‍ ഐനിലാണ് സ്റ്റോര്‍ തുറന്നത്. കസ്റ്റമേഴ്‌സിന് ആപ്പിളിന്‍റെ മുഴുവൻ ഉത്പന്നങ്ങളും സേവനങ്ങളും ഇവിടെ പരിചയപ്പെടാം. ആപ്പിള്‍ സ്റ്റോര്‍ ഓൺ‌ലൈനിലൂടെയുള്ള ഓർഡറുകൾ ഇവിടെ നിന്ന് സ്വീകരിക്കാം. കൂടാതെ, വ്യക്തിഗത സഹായം നേടാനും ‘ടുഡേ അറ്റ് ആപ്പിള്‍’ സെഷനുകളിൽ പങ്കെടുക്കാനും സാധിക്കും. “ഞങ്ങളുടെ ഏറ്റവും പുതിയതും നൂതനവുമായ iPhone സീരീസ് എത്തുന്ന ഈ സമയത്ത്, അൽ ഐനിലെ ഞങ്ങളുടെ ആദ്യ സ്റ്റോറായ Apple Al Jimi Mall തുറക്കുന്നതിൽ അതിയായ സന്തോഷമുണ്ട്,” Apple-ന്റെ റീട്ടെയിൽ, പീപ്പിൾ വിഭാഗം സീനിയർ വൈസ് പ്രസിഡന്റ് ഡീർഡ്രെ ഓബ്രിയൻ പറഞ്ഞു. “പുതിയ iPhone മോഡലുകൾ, Apple Watch Series 11, AirPods Pro 3 എന്നിവയുൾപ്പെടെയുള്ള Apple ഉൽപ്പന്നങ്ങൾ കണ്ടെത്താനും അനുഭവിക്കാനും ‘ഗാർഡൻ സിറ്റിയിലെ’ കസ്റ്റമേഴ്‌സിനെ സഹായിക്കാൻ ഞങ്ങളുടെ ടീം ആകാംക്ഷയോടെ കാത്തിരിക്കുകയാണ്.” Apple Al Jimi Mall-ൽ കസ്റ്റമേഴ്‌സിന് M4 ചിപ്പുകൾ ഉപയോഗിച്ച് പ്രവർത്തിക്കുന്ന MacBook Pro, Apple Pencil Pro ഉള്ള iPad Pro, Apple Watch Series 11, പുതിയ AirPods Pro 3 പോലുള്ള ആക്‌സസറികൾ എന്നിവ ഉൾപ്പെടെ ഏറ്റവും പുതിയ ഉത്പന്നങ്ങൾ വാങ്ങാം. സ്പെഷ്യലിസ്റ്റുകളുമൊത്തുള്ള വ്യക്തിഗത ഷോപ്പിങ് സെഷനുകൾ, പ്രതിമാസ തവണകളായി പണം അടയ്ക്കാനുള്ള സൗകര്യങ്ങൾ, ആപ്പിള്‍ ട്രേ‍ഡ് ഇന്‍ പ്രോഗ്രാമിലൂടെയുള്ള അപ്ഗ്രേഡിംഗ് തുടങ്ങിയ ആപ്പിളിൽ മാത്രം ലഭിക്കുന്ന റീട്ടെയിൽ സേവനങ്ങളും ഓഫറുകളും കസ്റ്റമേഴ്‌സിന് ഇവിടെ അനുഭവിക്കാൻ കഴിയും. ആപ്പിളിന്റെ സൗജന്യമായ ‘ടുഡേ അറ്റ് ആപ്പിള്‍’ പ്രോഗ്രാമിലൂടെ, കസ്റ്റമേഴ്‌സിന് അവരുടെ ആപ്പിള്‍ ഉപകരണങ്ങൾ പരമാവധി ഉപയോഗപ്പെടുത്തുന്നതെങ്ങനെയെന്ന് പഠിക്കാൻ അവസരമുണ്ട്. വിദ്യാർഥികളുടെ വിദ്യാഭ്യാസപരമായ കാര്യങ്ങളിൽ ആപ്പിള്‍പിന്തുണ നൽകാൻ പ്രതിജ്ഞാബദ്ധമാണ്.

യുഎഇ: വാഹനാപകടത്തിൽ ഗര്‍ഭിണി അടക്കം രണ്ട് സഹോദരിമാർ മരിച്ചു

UAE Accident Death അൽ ഐൻ: അൽ ഐനിൽ ഉണ്ടായ വാഹനാപകടത്തിൽ രണ്ട് എമിറാത്തി സഹോദരിമാർ മരിച്ചു. ഇമാൻ സലേം മർഹൂൺ അൽ അലവി, അമീറ സലേം മർഹൂൺ അൽ അലവി എന്നിവരാണ് മരിച്ചതെന്ന് യുഎഇ ഫ്യൂണറൽ സർവീസ് അക്കൗണ്ടായ @Janaza_UAE ഇൻസ്റ്റാഗ്രാമിൽ അറിയിച്ചു. ഔദ് അൽ തോബ ഏരിയയിലാണ് അപകടം നടന്നത്. ഒരു യുവ അറബ് പൗരൻ ഓടിച്ച വാഹനം നിയന്ത്രണം വിട്ട് സഹോദരിമാർ സഞ്ചരിച്ച കാറിൽ ഇടിക്കുകയായിരുന്നു. അപകടത്തിൽ മരിച്ച സഹോദരിമാരിൽ ഒരാൾ ആറ് മാസം ഗർഭിണിയായിരുന്നു. ഭാര്യയുടെയും ഗർഭസ്ഥശിശുവിന്റെയും മരണം ദൈവഹിതമായി അംഗീകരിക്കുന്നുവെന്ന് പറഞ്ഞ അവരുടെ ഭർത്താവ്, ഇത്തരം ദുരന്തങ്ങൾ ഒഴിവാക്കാൻ യുവ ഡ്രൈവർമാർ വേഗപരിധി പാലിക്കണമെന്ന് അഭ്യര്‍ഥിച്ചു. ബുധനാഴ്ച അസർ നമസ്‌കാരത്തിന് ശേഷം ഉം ഗാഫയിലെ അൽ ഷഹീദ് ഒമർ അൽ മഖ്ബലി മസ്ജിദിൽ വെച്ച് മരിച്ചവർക്കായി മയ്യിത്ത് നമസ്‌കാരം നടന്നു. ഉം ഗാഫ സെമിത്തേരിയിൽ വെച്ച് സഹോദരിമാരെ പിന്നീട് ഖബറടക്കി. യുഎഇയിൽ ഉടനീളമുള്ള മയ്യിത്ത് നമസ്‌കാരങ്ങളെയും ഖബറടക്കങ്ങളെയും കുറിച്ചുള്ള വിവരങ്ങൾ പങ്കുവെക്കുന്ന @Janaza_UAE എന്ന അക്കൗണ്ടാണ് ആദ്യം ഈ വിവരം പുറത്തുവിട്ടത്.

UAE Fuel Cost യുഎഇയില്‍ ഒക്ടോബറിലെ ഇന്ധന വിലയിൽ മാറ്റം: പെട്രോൾ, ഡീസൽ വില ഉടൻ കൂടുമോ കുറയുമോ?

UAE Fuel Cost ദുബായ്: ഒക്ടോബർ മാസത്തെ പെട്രോൾ, ഡീസൽ വില യുഎഇ അടുത്ത ദിവസങ്ങളിൽ പ്രഖ്യാപിക്കും. പ്രതിമാസമുള്ള ഈ വിലമാറ്റങ്ങൾ ഇന്ധന ബഡ്ജറ്റുകളെയും ദൈനംദിന ചെലവുകളെയും ബാധിക്കുന്നതിനാൽ പല താമസക്കാരും ആകാംഷയോടെയാണ് കാത്തിരിക്കുന്നത്. നിലവിലെ ഇന്ധന വില (സെപ്തംബർ മാസത്തേത്): സൂപ്പർ 98 പെട്രോൾ: ലിറ്ററിന് 2.70 ദിർഹം, സ്‌പെഷ്യൽ 95: ലിറ്ററിന് 2.58 ദിർഹം, ഇ-പ്ലസ്: ലിറ്ററിന് 2.51 ദിർഹം, ഡീസൽ: ലിറ്ററിന് 2.66 ദിർഹം (ഓഗസ്റ്റിൽ ഇത് 2.78 ദിർഹം ആയിരുന്നു) 2015-ൽ ഇന്ധനവില നിയന്ത്രണം ഒഴിവാക്കിയതിനുശേഷം, യുഎഇയിലെ പ്രതിമാസ വിലകൾ സാധാരണയായി ആഗോള എണ്ണവിപണിയിലെ പ്രവണതകളെ ആശ്രയിച്ചിരിക്കും. സെപ്തംബർ 30നകം ഒക്ടോബറിലെ വില പ്രഖ്യാപിക്കാനിരിക്കെ, ഇന്ധനച്ചെലവ് കുറയുമോ എന്ന ആകാംഷയിലാണ് വാഹനപ്രേമികൾ. ഔദ്യോഗിക പ്രഖ്യാപനം വന്നിട്ടില്ലെങ്കിലും, ആഗോള എണ്ണവിപണിയിലെ നിലവിലെ പ്രവണതകൾ ചില സൂചനകൾ നൽകുന്നു. ഈ മാസം എണ്ണവില വർധിച്ചിട്ടുണ്ട്. ബ്രെന്റ് ക്രൂഡ് വില ഒരു ബാരലിന് 68 ഡോളറിലധികവും യുഎസ് എണ്ണവില 64 ഡോളറിലധികവുമാണ്. യുഎസ്-റഷ്യ പ്രശ്‌നങ്ങൾ, ഒപെക്+ വിതരണത്തെക്കുറിച്ചുള്ള ആശങ്കകൾ എന്നിവയുൾപ്പെടെയുള്ള ആഗോള സംഘർഷങ്ങളാണ് വില വർധിപ്പിക്കുന്നത്. കഴിഞ്ഞയാഴ്ച യുഎസ് ക്രൂഡ് ഓയിൽ ശേഖരം കുറഞ്ഞതും യൂറോപ്പിൽ റഷ്യൻ വിതരണ തടസ്സങ്ങൾ കാരണം ഡീസൽ വില ഉയർന്നതും ആഗോളതലത്തിൽ വില വർദ്ധിപ്പിക്കുന്നു. ഈ സാഹചര്യത്തിൽ, യുഎഇയിലെ ഇന്ധനവില അടുത്ത മാസം സ്ഥിരമായി തുടരാനോ നേരിയ തോതിൽ ഉയരാനോ സാധ്യതയുണ്ട്. എന്നാൽ, ഭൗമരാഷ്ട്രീയ സംഘർഷങ്ങൾ രൂക്ഷമാവുകയോ വിതരണം അപ്രതീക്ഷിതമായി തടസ്സപ്പെടുകയോ ചെയ്താൽ മാത്രമേ വലിയ വർദ്ധനവിന് സാധ്യതയുള്ളൂ.

യുഎഇയില്‍ അടുത്ത വര്‍ഷം വരുന്ന അവധിദിനങ്ങള്‍ ഏതെല്ലാം? എത്ര ദിനങ്ങള്‍ ലഭിക്കും?

UAE public holidays 2026 ദുബായ്: 2026ലെ പൊതു അവധി ദിനങ്ങൾ യുഎഇ ഇതുവരെ ഔദ്യോഗികമായി പ്രഖ്യാപിച്ചിട്ടില്ല. എന്നിരുന്നാലും, പുതുക്കിയ പൊതു അവധി നിയമവും, ഇസ്ലാമിക ഹിജ്‌രി കലണ്ടർ തീയതികളും പ്രതീക്ഷിക്കുന്ന അവധി ദിവസങ്ങളെക്കുറിച്ചുള്ള വിശ്വസനീയമായ മാർഗ്ഗനിർദ്ദേശം നൽകുന്നു. ദേശീയ, മത, ചരിത്ര അവധി ദിനങ്ങളുടെ സംയോജനമാണ് രാജ്യം ആഘോഷിക്കുന്നത്. ഈദ് അൽ ഫിത്തർ, ഈദ് അൽ അദ്ഹ തുടങ്ങിയ ഇസ്ലാമിക അവധി ദിനങ്ങളുടെ കൃത്യമായ തീയതികൾ ചന്ദ്രനെ കാണുന്നതിനെ ആശ്രയിച്ചിരിക്കുകയും സമയത്തോട് അടുത്ത് സ്ഥിരീകരിക്കുകയും ചെയ്തിട്ടുണ്ടെങ്കിലും, താമസക്കാരെ മുൻകൂട്ടി ആസൂത്രണം ചെയ്യാൻ സഹായിക്കുന്നതിന് ജ്യോതിശാസ്ത്രജ്ഞർ 2026-ലെ സാധ്യതയുള്ള തീയതികൾ പ്രവചിച്ചിട്ടുണ്ട്. ഈ കണക്കുകൾ യുഎഇയുടെ അവധിക്കാല ഘടനയെ പിന്തുടരുന്നു, കൂടാതെ 1447–1448 AH-ലെ ഹിജ്‌രി-ഗ്രിഗോറിയൻ തീയതി പരിവർത്തനങ്ങളെ അടിസ്ഥാനമാക്കിയുള്ളതുമാണ്. ചന്ദ്രമാസ കലണ്ടറിലെ മാറ്റങ്ങൾ അനുസരിച്ച്, ആറ് ദിവസം വരെ നീണ്ടുനിൽക്കുന്ന ഒരു ലോംഗ് വീക്കെൻഡിനും സാധ്യതയുണ്ട്. 2025 അവസാനിക്കാൻ ഇനി കുറച്ച് പൊതു അവധികൾ മാത്രമാണ് ശേഷിക്കുന്നത്. ഈ അവസരം വിശ്രമിക്കാനും ചെറിയ യാത്രകൾ ആസൂത്രണം ചെയ്യാനും ഉപയോഗിക്കാം. 2025-ലെ അവധികൾ (ശേഷിക്കുന്നത്)- യുഎഇ ദേശീയ ദിനം (ഈദ് അൽ ഇത്തിഹാദ്) – ഡിസംബർ 2, 3 (ചൊവ്വ, ബുധൻ) സാധാരണയായി ഡിസംബർ 1 ന് ആചരിക്കുന്ന സ്മരണ ദിനവുമായി (Commemoration Day) ചേർത്താൽ, ഈ മധ്യവാരത്തിലെ അവധി നാല് ദിവസത്തെ നീണ്ട വീക്കെൻഡ് ആയി മാറാൻ സാധ്യതയുണ്ട്. 2024-ലെ കാബിനറ്റ് പ്രമേയം നമ്പർ 27 അനുസരിച്ച്, മറ്റ് അവധികളുമായി കൂട്ടിമുട്ടുകയോ വാരാന്ത്യത്തിൽ വരികയോ ചെയ്യുന്നില്ലെങ്കിൽ, കൂടുതൽ ദൈർഘ്യമുള്ള അവധികൾ സൃഷ്ടിക്കുന്നതിനായി യുഎഇ കാബിനറ്റിന് പൊതു അവധികൾ ആഴ്ചയുടെ തുടക്കത്തിലേക്കോ അവസാനത്തിലേക്കോ മാറ്റാൻ അധികാരമുണ്ട്. 2026-ലെ ഔദ്യോഗിക അവധി തീയതികൾ പ്രഖ്യാപിച്ചിട്ടില്ലെങ്കിലും ജ്യോതിശാസ്ത്രപരമായ വിവരങ്ങളും യുഎഇയുടെ പൊതു അവധി നിയമങ്ങളും അനുസരിച്ച് പ്രതീക്ഷിക്കുന്ന അവധി ദിവസങ്ങൾ താഴെ നൽകുന്നു: 2026-ലെ സാധ്യതയുള്ള പൊതു അവധികൾ (സ്ഥിരീകരിക്കുന്നതിന് വിധേയം)- പുതുവത്സര ദിനം ജനുവരി 1 വ്യാഴം, ഈദ് അൽ ഫിത്തർ മാർച്ച് 20 മുതൽ മാർച്ച് 22 വരെ, അറഫാ ദിനം മെയ് 26, ഈദ് അൽ അദ്ഹ മെയ് 27 മുതൽ മെയ് 29 വരെ, ഇസ്ലാമിക് ന്യൂ ഇയർ ജൂൺ 16, നബിദിനം ഓഗസ്റ്റ് 25, യുഎഇ ദേശീയ ദിനം ഡിസംബർ 1, 2.

ശമ്പളത്തില്‍ ‘മുക്കാല്‍’ ഭാഗവും പൂച്ചകള്‍ക്ക്; യുഎഇയില്‍ മലയാളി വീട്ടമ്മ പ്രതിസന്ധിയില്‍

Malayali Woman Ayisha ദുബായ്: വർഷങ്ങളായി കൂടെപ്പിറപ്പുകളെപോലെ സംരക്ഷിച്ച 65 പൂച്ചകളെ ഉപേക്ഷിക്കേണ്ടി വരുമോ എന്ന ആശങ്കയിലാണ് ദുബായില്‍ താമസമാക്കിയ ആയിഷ. ആയിഷയ്ക്ക് പരിചയമുള്ള ഒരു സ്ത്രീ തെരുവു പൂച്ചകൾക്ക് ഭക്ഷണം നൽകുന്ന പതിവുണ്ടായിരുന്നു. കോവിഡ് 19 കാലത്ത് അവർ അവധിക്ക് ഇന്ത്യയിലേക്ക് പോകുമ്പോൾ ആയിഷയോട് എന്തുകൊണ്ട് നിങ്ങൾക്ക് ഞാൻ ചെയ്യുന്ന പോലെ തെരുവുപൂച്ചകൾക്ക് ഭക്ഷണം നൽകിക്കൂടായെന്ന് ചോദിച്ചു. ആ വെല്ലുവിളി ആയിഷ ഏറ്റെടുത്തു, പരിസരപ്രദേശങ്ങളിലൊക്കെ അമ്മയോടൊപ്പം കറങ്ങിനടന്ന് തെരുവുപൂച്ചകൾക്ക് ഭക്ഷണം നൽകിത്തുടങ്ങി. അഞ്ച് മാസം കഴിഞ്ഞ് ആ സ്ത്രീ തിരിച്ചുവന്ന് തെരുവുപൂച്ചാ സംരക്ഷണത്തിൽ നിന്ന് താൻ വിട്ടുനിൽക്കുന്നതായി അറിയിച്ചു. എന്നാൽ, ആയിഷ അപ്പോഴേയ്ക്കും സഹജീവിസ്നേഹം തുടരാതിരിക്കാൻ പറ്റാത്ത അവസ്ഥയിലായിക്കഴിഞ്ഞിരുന്നു. തന്നെ കാത്ത് നിത്യവും ഒട്ടേറെ പൂച്ചകൾ പ്രതീക്ഷയോടെ തെരുവുകളിൽ അലയുന്നു എന്ന ചിന്ത അവരെ സേവനനിരതയാക്കി. അവറ്റകൾക്ക് ഭക്ഷണം നൽകുക മാത്രമല്ല, വാഹനം തട്ടിയും മറ്റും പരുക്കേൽക്കുകയോ, രോഗം ബാധിക്കുകയോ ചെയ്തവയ്ക്ക് വെറ്റിനറി ക്ലിനിക്കുകളിൽ നിന്ന് ചികിത്സ നൽകി തന്റെ ഫ്ലാറ്റിലേക്ക് താമസിപ്പിക്കുകയും ചെയ്തു. നിത്യവും 120 മുതൽ 150 തെരുവുപൂച്ചകൾക്ക് വരെ ആയിഷ പായ്ക്കറ്റ് ഭക്ഷണം നൽകുന്നു. ഇതിനായി മാത്രം ഇവർ തന്റെ 7000 ദിർഹം ശമ്പളത്തിൽ നിന്ന് 5000 ദിർഹം വരെ പ്രതിമാസം ചെലവാക്കുന്നു. ഇതിന് പുറമെ, ഫ്ലാറ്റുകളുടെ വാടകയും ആശുപത്രി ചെലവുകളും ആയിഷയ്ക്കുണ്ട്. കെട്ടിടം മാനേജ് ചെയ്യുന്നവർ തെരുവു പൂച്ചുകളെ ഫ്ലാറ്റുകളിൽ താമസിക്കാൻ അനുവദിക്കുന്നില്ല. ഡിസംബർ വരെ കാലാവധിയുണ്ടെങ്കിലും ഈ മാസം 28ന് ഒഴിയണമെന്നാണ് ആവശ്യം. എന്തു ചെയ്യണമെന്നറിയാതെ പ്രതിസന്ധിയിലാണ് ആയിഷയും മാതാവും. അധികൃതരുടെ ഭാഗത്ത് നിന്നുള്ള സഹായവും പിന്തുണയും തന്നെയാണ് പ്രതീക്ഷ. ജീവനുതുല്യം സ്നേഹിക്കുന്ന ഈ മിണ്ടാപ്രാണികളെ താനൊരിക്കലും ഉപേക്ഷിക്കില്ലെന്ന നിലപാടിലായിരുന്നു ആയിഷ.