Mule Account Fraud മ്യൂൾ അക്കൗണ്ട് തട്ടിപ്പിലൂടെ ബന്ധുവിന്റെ ചതിയിൽ കുടുങ്ങി കേസിലകപ്പെട്ട് 21 കാരി. കാസർകോട് സ്വദേശിനിയായ ഇരുപത്തിയൊന്നുകാരിയ്ക്കാണ് ഇത്തരത്തിലൊരവസ്ഥ ഉണ്ടായത്. മാസങ്ങൾക്കു മുൻപ് ബെംഗളൂരു സൈബർ പൊലീസിൽ നിന്ന് നോട്ടീസ് ലഭിച്ചപ്പോഴാണ് ഓൺലൈൻ തട്ടിപ്പു കേസിൽ താൻ പ്രതിയായ വിവരം 21 കാരിയായ യുവതി മനസിലാക്കുന്നത്. ബന്ധുവായ സാജിതയെന്ന സ്ത്രീ ആവശ്യപ്പെട്ട പ്രകാരം ബാങ്ക് അക്കൗണ്ട് തുടങ്ങി അതിന്റെ വിവരങ്ങൾ എല്ലാം കൈമാറിയതാണ് യുവതിയെ കേസിൽ കുടുക്കിയത്. തന്റെ അക്കൗണ്ടിലേക്കു പണം അയയ്ക്കാൻ കഴിയാത്തതിനാൽ ഒരു ബാങ്ക് അക്കൗണ്ട് ആരംഭിച്ചു തരാൻ കഴിയുമോയെന്ന് സാജിത തന്നോട് ചോദിച്ചിരുന്നുവെന്ന് യുവതി പറയുന്നു. പിന്നീട് ഇവർ സാജിതയെ വിശ്വസിച്ച് അക്കൗണ്ട് ആരംഭിച്ചു. എടിഎം കാർഡും ഇന്റർനെറ്റ് ബാങ്ക് വിവരങ്ങളും അക്കൗണ്ടുമായി ബന്ധപ്പെടുത്തിയ സിമ്മും ഇവർ സാജിതയ്ക്ക് കൈമാറി. എടിഎം കാർഡിന് ഇന്റർനാഷനൽ അക്സസ് വേണമെന്ന് സാജിത പറഞ്ഞിരുന്നു. എന്നാൽ ഈ അക്കൗണ്ടു വഴി ലക്ഷക്കണക്കിനു രൂപയുടെ ഇടപാടുകൾ നടന്നുവെന്ന ഞെട്ടിക്കുന്ന വിവരം ബെംഗളൂരു സൈബർ പൊലീസ് നോട്ടിസ് വരുമ്പോഴാണ് യുവതി അറിയുന്നത്. പരിഭ്രമത്തിലായ യുവതി തുടർന്ന് പൊലീസിൽ പരാതി നൽകുകയായിരുന്നു. അന്വേഷണത്തിനൊടുവിൽ സൈബർ പൊലീസ് സാജിതയെ അറസ്റ്റ് ചെയ്തു. ദുബായിൽനിന്നു മടങ്ങിയെത്തിയ സാജിത മുംബൈയിൽ വച്ചാണ് അറസ്റ്റിലായത്. ഇത്തരത്തിൽ മ്യൂൾ അക്കൗണ്ടുകൾ ആരംഭിച്ച് അത് വിദേശത്തുള്ള സൈബർ ക്രിമിനൽ ശൃംഖലകൾക്കു വിൽക്കുകയാണ് ഇവർ ചെയ്യുന്നത്. സാജിതയുടെ കൂട്ടുപ്രതിയായ സാബിറിനെ കണ്ടെത്താനുള്ള അന്വേഷണത്തിലാണ് ഇപ്പോൾ പൊലീസ്. കുടുംബത്തിൽ തന്നെയുളള നാലു ബന്ധുക്കളെ കൊണ്ട് സാജിത ഇത്തരത്തിൽ അക്കൗണ്ടുകൾ തുറന്നിരുന്നു. 21കാരിയുടെ അക്കൗണ്ടിലൂടെ മാത്രം 2024 മാർച്ച് മുതൽ ലക്ഷക്കണക്കിനു രൂപയുടെ ഇടപാടുകൾ നടത്തിയതായി ബാങ്ക് പരിശോധനയിൽ നിന്നു വ്യക്തമായി. തട്ടിപ്പിനായി സാജിത വിദ്യാർത്ഥികൾ ഉൾപ്പെടെ നിരവധി പേരെ ഉപയോഗപ്പെടുത്തിയിട്ടുണ്ട്. ദുബായിലുള്ള ചൈനീസ് ഓപ്പറേറ്റർമാർക്കാണ് അക്കൗണ്ടുകൾ വിൽക്കുന്നതെന്ന് സാജിത ചോദ്യം ചെയ്യലിൽ സമ്മതിച്ചു. ഇത്തരം അക്കൗണ്ടുകളിലേക്ക് എത്തുന്ന പണം വിദേശത്ത് എടിഎം കാർഡുകൾ ഉപയോഗിച്ച് പിൻവലിക്കുകയാണ് ചെയ്യുന്നതെന്നും സാജിത വെളിപ്പെടുത്തി. സംഭവത്തിൽ വിശദമായ അന്വേഷണം പുരോഗമിക്കുകയാണ്. അതേസമയം, മ്യൂൾ അക്കൗണ്ടുകൾ വഴിയുള്ള തട്ടിപ്പുകൾ സംസ്ഥാനത്ത് വർദ്ധിച്ചു വരികയാണെന്നും ജാഗ്രത പാലിക്കണമെന്നും പൊലീസ് മുന്നറിയിപ്പ് നൽകി.